Þjóðskrá og 32 stafa nöfnin

Er ekki með endemum að ennþá skuli það vera þannig að nöfn fólks eru stytt af því að eitthvað gagnasafn ræður ekki við lengri nöfn en 32 stafa? 

Ég bendi á þessa grein hér. Ég held, en er ekki viss, að þetta vandamál með stafina 32 sé arfleifð frá gömlu gataspjöldunum. Menn hættu að nota þau fyrir um það bil 50 árum.

 

Athugasemdir

[Margrét St Hafsteinsdóttir, 19.1.2008 kl. 22:42]

Nafnið mitt er stytt í þjóðskrá.  Með bilum er það 33 stafir.  Mér finnst þetta asnalegt.

[Hörður Mar (IP-tala skráð) 15.2.2008 kl. 11:17]

Ég held að þessi gagnagrunnsdálkur sem þú ert að tala um hafi ekki þann tilgang að skjalfesta full nöfn fólks. Hann er notaður þegar það á að prenta á umslög og fylla út skjöl. Kannski er þessi lengd arfleifð frá gataspjöldum, en hún er ennþá hentug þegar pláss er takmarkað. Sjálfsagt er þá að stytta nöfn samkvæmt óskum viðkomandi í staðinn fyrir að einhver geri það af handahófi á skrifstofu. Eftir því sem ég best veit heldur Þjóðskrá líka utan um fullt nafn. Sá listi er bara nokkur MB að stærð svo það er ekkert stórmál. Sumir líta eflaust á það sem birtingarform fasisma að við getum ekki haft misbreið ökuskírteini, að skattframtalið þurfi að vera á stöðluðu eyðublaði sem er eins fyrir allt þetta ólíka fólk og að Halldór þurfi endilega að vera skrifað með tveimur ellum. Aðrir eru kannski þakklátir fyrir að þurfa ekki að eyða deginum í að semja skattframtal frá eigin brjósti, sauma sér veski með misstórum vösum og stafa nafnið sitt fyrir alla sem þeir hitta. Sumum finnst gaman að stafa nafnið sitt, öðrum finnst það leiðinlegt. Við erum nefnilega svo ólík, ef ekki bara einstök, hvert og eitt.

[Guðmundur D. Haraldsson, 15.2.2008 kl. 23:29]

Hörður Mar sagði:

Ég held að þessi gagnagrunnsdálkur sem þú ert að tala um hafi ekki þann tilgang að skjalfesta full nöfn fólks. Hann er notaður þegar það á að prenta á umslög og fylla út skjöl. [..]

Vandamálið er að lögformlega heitir maður því nafni sem er skráð í þjóðskrá og engu öðru. Það verður að teljast undarlegt að svo stutt nafn sem 32 stafir sé hámarkið.